BƏYBALA MİRZƏYEV: 

Yoxa çıxan "inqilab" illüziyası...

Putin bu gün yenidən rus xalqına müraciət etdi, qiyamdan danışdı və bu müraciət göstərdi ki, onun birinci müraciətində1917-ci il vətəndaş müharibəsindən danışması həqiqətən də yersiz imiş.

Üstəgəl, "qiyam" barədə Priqojinlə öncədən razılaşmanın olub-olmaması məsələsində də müəyyən mənada aydınlıq yarandı.

Məlum oldu ki, belə bir razılaşma barədə şayiəni qiyam ərəfəsində Priqojinin özü yayıbmış. O, öz tabeliyindəki "Vaqner"çilərə - muzdlu döyüçşülərə bildiribmiş ki, bəs, Putin hal-hazırda müdafiə naziri Sergey Şoyqunun və digər güc strukturlarının girovuna çevrilib, onları vəzifələrindən uzaqlaşdıra bilmir, ona görə də Putinə kömək etmək lazımdır ki, Şoyqu, Gerasimov kimi korupsioner-mafioz şəxsləri neytrallaşdıra bilsin, təmizləsin. Priqojin öz döyüşçülərini sözügedən qiyama məhz bu "əfsanə" əsasında motivə edib, kökləyibmiş.

Baş verənlərdən qorxuya düşən Putin isə dərhal Kremlə gələrək iyunun 24-də Rusiya əhalisinə birinci videomüraciətinin çəkilişində iştirak edir. Həmin müraciətində Putinin ayrı-ayrı ifadələrindən və emosional durumundan, səs tonundan da açıq-aşkar görünür ki, Rusiya lideri hadisələrin bu cür gedişatına qətiyyən hazır deyilmiş və buna görə də baş verənlərin əvvəlcə 1917-ci il hadisələrinin (inqilabi çevriliş, vətəndaş müharibəsi və s.) təkrarı olduğunu düşünürmüş.

Bu gün yayılan ikinci videomüraciətində isə Rusiya lideri 1917-ci il hadisələrindən bir kəlmə də danışmadı. Əksinə, o, əminliklə bildirdi ki, silahlı üsyan onsuz da yatırılacaqdı.

Bu mənada, iyunun 24-dəki Putinlə bugünkü Putin arasında yerlə göy qədər fərq var. Psixoloji portretləri, bədən dilləri çox fərqlidir.

Bugünkü Putinin səs tonunda da, üz ifadəsində də, jestlərində də özgüvən və məmnunluq nəzərə çarpırdı. Hiss olunur ki, o, özünü situasiyanın qalibi və yaxud, ziyafətin favoriti hesab edir.

Çünki sözügedən qiyamın qarşısının dinc yolla alınması Putinə necə deyərlər, "bir güllə ilə iki dovşan vurmaq" imkanı verdi. Həm Belarusa "sürgün" olunmaqla Priqojinin özünü neytrallaşdırmaq mümkün oldu, həm də Kreml rəhbəri Şoyquya və bütün generalitetə yenidən öz hökmünü diktə etmək imkanını qazandı.

Beləliklə, nəlbəkidə baş verən "fırtına" kimi hazırkı Rusiyada yaradılmış süni "inqilabi şərait", "silahlı üsyan", "ədalət marşı" və sair illüziyalar bir göz qırpımında yoxa çıxdı. Məlum oldu ki, 1917-ci ilin Rusiyasından fərqli olaraq günümüz Rusiyasında inqilabi şəraitin hətta izi-tozu belə yoxdur. Çünki propaqanda ilə zombiləşdirilmiş, şovinizm və nasizm ideyalarına yoluxdurulmuş toplumlarda inqilabi meyllər arxa plana keçir.

1917-ci il Rusiyası "Böyük Oktyabr sosialist inqilabı" ilə bütün dünyanı silkələyən, dünya düzənini dəyişən, iki qütblü (bipolyar) dünyanın əsasını qoyan, məzlum Şərq xalqlarından tutmuş Avropa xalqlarına (hətta Fransa və İtaliyaya) qədər - dünyanın böyük bir kəsimini öz cazibəsinin təsiri altına salan inqilabi ideyalar ölkəsi idi. Həmin vaxt az qala bütün dünya Rusiya inqilabının gedişatını böyük coşqu və rəğbət hissilə izləyirdi.

Bugünkü Rusiyanın neoimperialist-işğalçı mövqeyi isə bir çoxlarında sadəcə olaraq dərin təəssüf hissi doğurur. İndiki Rusiya öz tarixinin ən boz və ziddiyətli dövrünü yaşayır...

(Ardı var)

Yazının əvvəli bu keçiddə:

https://www.facebook.com/photo?fbid=2349776145214855&set=a.288220191370471