BƏYBALA MİRZƏYEV:
Siyasi karyeranın sonu?
Son 2-3 gün ərzində bir-birinin ardınca dörd siyasi partiya bağlanıb. Daha doğrusu, son dövrlərin populyar ifadəsi ilə desək, dörd partiya özünü buraxıb.
Sözügedən partiyalardan ikisinin lideri ölkədə kifayət qədər ünlü simalardır. Söhbət Azərbaycan Liberal Partiyasının sədri, professor Lalə Şövkətdən və Vətəndaş və İnkişaf Partiyasının bu yaxınlarda əfv edilən sədri Əli Əliyevdən gedir.
Azərbaycan Liberal Partiyası dünən öz fəaliyyətinə son verdiyi barədə bəyanat yayıb.
Vətəndaş və İnkişaf Partiyasının özünü buraxması barədə bəyanat isə bu gün yayılıb.
Azərbaycan Liberal Partiyası bir zamanlar ölkənin ən fəal siyasi təşkilatlarından biri sayılırdı. Həmin vaxt dövlət katibi olan Lalə Şövkət tutduğu vəzifədən yenicə istefa verərək müxalifət düşərgəsinə keçmişdi.
Lalə Şövkətin cəmiyyətdə böyük nüfuzu vardı. Ona görə də 3 iyun 1995-ci ildə L.Şövkətin rəhbərliyi ilə Bərdə şəhərində təsis konfransında yaradılan bu partiyanın sıralarına qoşulanların sayı çox idi.
Lakin sonralar bəlli səbəblərdən sözügedən partiyanın fəaliyyəti digər partiyaların fəaliyyəti kimi getdikcə sönükləşdi. Günün birində isə Lalə Şövkət xanım ümumiyyətlə böyük siyasətdən çəkildi, partiyanın rəhbərliyindən getdi. Son illərdə ALP-na Əvəz Temirxan rəhbərlik edirdi.
Əli Əliyev də ən fəal partiya sədrlərindən biri olub. Onun rəhbərlik etdiyi Vətəndaş və İnkişaf Partiyası 3 dəfə parlament (2010, 2015, 2020), 2 dəfə isə prezident (2013, 2018) seçkilərində iştirak edib.
Ə.Əliyev 2021-ci il noyabrın 30-da qəzaya uğrayan DSX-ya məxsus "Mi-17" tipli helikopterdə sağ qalan polkovnik-leytenant Emil Cəfərov və kapitan Ramin Ədilovun xüsusi ittiham qaydasında şikayəti əsasında Cinayət Məcəlləsinin 147.1-ci maddəsinə (böhtan) uyğun olaraq 5 ay müddətinə azadlıqdan məhrum ediləndən sonra Vətəndaş və İnkişaf Partiyası faktiki olaraq fəaliyyətini dayandırmışdı.
Bu ilin may ayında prezidentin sərəncamı ilə əfv edilən Əli Əliyevin partiyasının bu gün yaydığı açıqlamada bildirilib ki, Vətəndaş və İnkişaf Partiyası "Siyasi partiyalar haqqında" yeni qanunun tələblərinə uyğun olaraq öz fəaliyyətini dəyandırmaq haqqında qərar qəbul edib.
Lalə Şövkətin bundan sonra siyasi səhnəyə qayıdacağı artıq real görünmür. Bəs Əli Əliyevin gələcək siyasi karyerası necə davam edəcək? Vətəndaş və İnkişaf Partiyasının öz fəaliyyətinə xitam verməsini Əli Əliyev üçün yolun sonu hesab etmək olarmı?
Bu sualları şübhəsiz ki, onun özünün cavablandırması daha məqbul olardı. Əli Əliyev keçmişdə həm həkimlik, həm də müəllimlik etsə də, lakin xasiyyətcə kabinet adamı deyil və sakit həyat tərzini sevmir. O, publika ilə ünsiyyəti, kütlə qarşısında çıxışlar etməyi xoşlayır. Odur ki, partiyasız qalsa da, lakin hansısa formada siyasi fəaliyyətini davam etdirəcək. Və heç şübhəsiz ki, deputat və ya prezident seçilmək iddialarından da əl çəkməyib.
Bu arada fəaliyyətinə xitam verən partiyaların sayının yenə də artacağı istisna olunmur. Qarşıdakı 5 gün ərzində yəqin ki, daha 5 partiyanın bağlanmasının şahidi olacayıq.
Beləliklə, ölkəmizin siyasi vitrinində hardasa 20-25 partiyanın qalacağı gözlənilir. Sonradan həmin partiyalar da ideoloji cəhətdən bir-birinə yaxın olan partiyalarla birləşəcəklər.
Partiyaların sayının azalması ölkəmiz üçün, cəmiyyətimiz üçün yaxşıdırmı ya yox, bunu isə əlahəzrət zaman göstərəcək.
Yazının əvvəli bu keçiddə:
03 Comments
High Life tempor retro Truffaut. Tofu mixtape twee, assumenda quinoa flexitarian aesthetic artisan vinyl pug. Chambray et Carles Thundercats cardigan actually, magna bicycle rights.
Farm-to-table selfies labore, leggings cupidatat sunt taxidermy umami fanny pack typewriter hoodie art party voluptate cardigan banjo.
VHS Wes Anderson Banksy food truck vero. Farm-to-table selfies labore, leggings cupidatat sunt taxidermy umami fanny pack typewriter hoodie art party voluptate cardigan banjo.