Bülbülün anadan olmasının 126-cı ildönümü münasibətilə tədbir keçirildi

22 iyun 2023-cü il tarixində Bülbülün Memorial Muzeyində Azərbaycan professional vokal sənətinin banisi, SSRİ Xalq artisti, Stalin mükafatı laureatı, professor Bülbülün anadan olmasının 126-cı ildönümü münasibətilə tədbir keçirilmişdir. Tədbiri giriş sözü ilə açan muzeyin direktoru Fərqanə Cabbarova qonaqları salamlamış, Bülbülün yaradıcılığından bəhs etmişdir. O, 2023-cü ilin "Heydər Əliyev" ili elan olunduğunu qeyd etmiş, Ümummilli Lider Heydər Əliyevin Bülbüllə bağlı fikirlərini vurğulamışdır. 
Tədbirdə Azərbaycan Respublikasının Əməkdar artisti, Bülbül məktəbinin layiqli davamçısı Ramil Qasımov,  Azərbaycan Respublikasının Əməkdar artisti, Azərbaycan Milli Konservatoriyasının dosenti Anar Şuşalı, Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova çıxış etmişdirlər.
Tədbirdə Azərbaycan Dövlət Akademik Opera və Balet Teatrının solisti Fəhmin Əhmədli, Azərbaycan Milli Konservatoriyasının tələbələri, Milli Muğam Müsabiqəsinin diplomantları, İncəsənət Gimnaziyasının şagirdləri iştirak etmişdirlər. 
O cümlədən, Ümummilli Lider Heydər Əliyevin Bülbülün 100 illik yubileyindən çıxışı, dahi Bülbülün yaradıcılığına həsr olunmuş videoroliklər nümayiş etdirilmişdir.