ELÇİN MİRZƏBƏYLİ:

Aprel döyüşləri və Gəncə terrorundan dərs çıxarılmadı...

Aprel döyüşlərindən dərs çıxarılmadı...

Gəncə terrorundan da...

Tovuz döyüşlərinin, 44 günlük müharibənin informasiya məkanına sıçrayan kütləvi təxribat-təbliğat “səhnə”lərinin boşluqları da marığda dayanan və özünü hər kəsdən ağıllı sayan, ortada yeyib qıraqda gəzən çaqqal sürülərinə, leşyeyən qruplaşmalarına dərs olmadı, ayıblarına qısılıb sosial şəbəkələrin bir küncünə çəkilmədilər. Fürsət düşən, fit çalınan, komanda verilən kimi yenə hər kəsdən öncə virtual meydanlara axışıb baş verənlərin mahiyyətini dərk edib doğru yol göstərənləri sağdan-soldan didişdirməyə başladılar...

Son hadisələr bir daha göstərdi göstərdi ki, əclafların, dönüklərin, mövqeyini 180 dərəcə, həm də dəfələrlə dəyişdirib efirlərdə, sosial şəbəkələrdə ağız suyu axıdanların nə Vətəni olur, nə də milləti. Bunlar islah olunmayacaqlar, dəyişməyəcəklər. Buqələmun kimi rəngdən-rəngə düşəcək, pusquda dayanacaq və imkan düşən kimi bıçaq saplamağa kürək axtaracaqlar...

...Gəncə hadisələri zamanı gecəyarısı baş verənlərin gerçək mahiyyəti haqqında danışmaq, mümkün ehtimalları dilə gətirmək üçün telekanallardan birinə dəvət olunmuşdum. Getdim və bəlli oldu ki, indi ağzına çullu dovşan sığışmayan dil qəhrəmanlarının əksəriyyəti bu mövzuda danışmaqdan imtina edib və hətta deputatlardan biri futbola, sevimli komandasının –Fransanın oyununa baxdığını bəhanə gətirib. Oxşar mənzərə ilə sonralar da qarşılaşmışam.

...Son olaylarla bağlı, kütləyə emosional təsir göstərmək məqsədilə hazırlandığı şübhə doğurmayan video və foto görüntülər sosial şəbəkələrin “divar”larına ayaq açar-açmaz yenə də eyni çaqqal sürüsü və leşyeyən qruplarının mənsubları hələ faktlara söykənən, arqumentləşdirilmiş mövqe bildirməyə macal tapmamış, bircə kəlmə yazmamış, danışmamış, baş verənlər haqqında obyektiv məlumat almaq üçün hərəkətə keçən insanları şantaj və təhqir etməyə başladılar. Yəni emosional təsir mexanizmlərinin təsiri altına düşməyəcək adamları öncədən susdurmağa çalışdılar ki, gerçəyi ortaya çıxara biləcək ehtimallar dilə gətirilməsin. Hətta üzərilərində yekə-yekə epitetlər gəzdirən media mənsubları da ünvansız söyüş və təhqir yarışına çıxdılar: “İndi sıraya düzüləcəklər...”, filan... Gerisini yazmaq istəmirəm. “Adamlar” ömürlərini sırada, yaxud növbədə durmaqda keçirdikləri, “P..... meşəlik torpağı”ndan, yaxud başqa bir qütdən ötürülən sivri “tezis”lərə söykənməyə alışdıqları üçün hər kəsin onlar kimi, onurğasız yaşamağa məhkum olunduqlarını düşünürlər. Qınamıram, acıyıram...

Həvəsdi, bəsdi!

Kimsə düşünürsə ki, canları qədər sevdikləri Vətənlərini, istiqlalına, bayrağına, torpağına ömürlərini fəda etdikləri dövlətlərini fitrətdən hifz etmək təyinatıyla görəvləndirilənlər çaqqal sürülərinin, leşyeyən qruplaşmalarının linç kampaniyalarının qarşısında geri çəkilib, doğru bildikləri yoldan imtina edəcəklər, yanılırlar.

Köklərini qazıyıb bu torpaqlardan çıxaranadək bizə dinclik yoxdur!

Elçin Mirzəbəyli