“Şəhidlər ölməz, Vətən bölünməz!”  layihəsinə yeni şeir təqdim edildi

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasında “Şəhidlər ölməz, Vətən bölünməz!” layihəsi davam edir.
 Kitabxananın Fəxri oxucusu, AYB-nin üzvü, “Ömür axarı”, “Vətənsevər” və s. kitabların müəllifi, yazıçı-publisist, şair Bədirə Rza Həsənqızı mütəmadi olaraq əsərləri ilə layihəyə dəstək olur.
“Gülüstan” və “Xəzər nəğmələri” Ədəbi Birliklərin üzvü Bədirə Rza Həsənqızı Vətən  müharibəsi  şəhidi, leytenant  Məhəmməd  Zeynalovun   əziz   xatirəsinə həsr etdiyi “Bu  bir  hünər  yolu...” şeirini kitabxanaya təqdim etdi.
Şeirdə cəsarət, rəşadət yolunda şəhid olan Məhəmməd Zeynalovun Vətən tarixində uca zirvə olduğu ifadə edilir.
Neftçala rayonunun Bankə qəsəbəsində anadan olan Məhəmməd Zeynalov Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə qəhrəmancasına döyüşmüşdür. Şəhid Məhəmməd Zeynalov ölümündən sonra "Vətən uğrunda" və "Döyüşdə fərqlənməyə görə" medalları ilə təltif olunmuşdur.
Şeirin videogörüntüsü kitabxananın YouTube kanalında yerləşdirilib: https://www.youtube.com/watch?v=JIkO_URqylQ

Bu  bir  hünər  yolu... 

Çiçək açdı o tumurcuq arzular. 
Sənin gəlişinlə gülüstan oldu.
Bilməzdik, Məhəmməd, bu nakam ömrün
Vətən tarixində bir dastan oldu. ..

 Könüllər ağladı uzaq, yaxından, 
“Heyif   sizə”,  – deyə, el fəryad etdi...
 Nə edək, ya Vətən, ya övlad deyə?
 Oğullar Vətəni xilas eylədi...

 Bu bir hünər yolu, bir ər yoludu. 
Cəsarət, rəşadət, dəyər yoludur! 
Torpağın harayı, təpər yoludu!
 Səbr təşnəsindən – Zəfər qoludur! 

Dönmədi arxaya o gül balalar, 
Zaman ötsə belə, sevən arayar...
 And içdi müqəddəs yolu gedənə 
“Qisas qiyamətə qalmaz!” – çağlayar!     

 Sən seçdin yolunu, Şəhiddir adın!
 Kövrək xatirələr ünvanısan sən!
 Adında birləşib bir dünya sevgi
Hər könül evində  mehrab  kimisən! 

Yolunda bir işıq vardı əzəldən,
 İnamlı sabahın bir tacı sənsən... 
Adın ulduzundan daha da parlaq
Vətən tarixində uca zirvəsən!