Məktəb-studiyanın istedadları
Sumqayıt şəhər Qara Qarayev adına 
1 №-li Uşaq Musiqi Məktəbinin səhnəsində

Müxtəlif yönümlü fəaliyyəti ilə seçilən, mütəmadi olaraq yeni layihələrə imza atan Üzeyir Hacıbəyli adına Bakı Musiqi Akademiyasının Orta ixtisas musiqi məktəb-studiyasının şagirdləri 30 may 2023-cü il tarixində Sumqayıt şəhər Qara Qarayev adına 1 №-li Uşaq Musiqi Məktəbində Ulu öndər Heydər Əliyevin 100-illik yubileyinə həsr olunmuş konsert proqramı ilə çıxış etmişdilər. 
Bu layihənin keçirilməsi ilk növbədə məktəblərarası yaradıcılıq əlaqələrinin möhkəmlənməsinə xidmət edərək, musiqi təhsili sahəsində qarşılıqlı əlaqələr prinsipinin zəruriliyini vurğulayır. Eyni zamanda, bir çox yaradıcı işlərin təşəbbüskarı kimi hər zaman ön sıralarda olan məktəb-studiyanın əsas prioritetlərindən biri uzun illər bu müəssisənin musiqi elmi və təhsili sahəsində qazanılmış uğurlarını ölkə üzrə fəaliyyət göstərən Uşaq Musiqi Məktəbləri ilə paylaşması olmuşdur. 
Sumqayıt şəhər Qara Qarayev adına 1 №-li Uşaq Musiqi Məktəbində yüksək səviyyədə təşkil olunmuş məktəb-studiya şagirdlərinin konserti musiqisevərlər tərəfindən isti münasibətlə qarşılanmış və böyük marağa səbəb olmuşdur. Tədbir bir-birindən gözəl çıxışlarla yaddaşlarda qalmışdır. İlk olaraq, konsertin aparıcısı, məktəb-studiyanın böyük elmi işçisi Şəfəq Hacıyeva ön sözlə çıxış etdi və həmin günün böyük əhəmiyyətindən söhbət açaraq dünya şöhrətli siyasətçi, müdrik rəhbər, Ümummilli lider Heydər Əlirza oğlu Əliyevin Azərbaycanın bir müstəqil dövlət kimi inkişafı yolunda əvəzsiz xidmətlərindən bəhs etdi. Eyni zamanda o, Ulu öndərin elm və mədəniyyət sahəsindəki məqsədyönlü işlərini, incəsənət sahəsinə və bu istiqamətdə çalışan görkəmli xadimlərə bəslədiyi xüsusi məhəbbət və rəğbəti vurğuladı.
Rəngarəngliyi ilə maraq doğuran tədbirdə Azərbaycan və xarici bəstəkarlarının yaradıcılıqlarından götürülmüş nadidə musiqi nümunələri ifa olunmuşdur. 
Xüsusilə qeyd olunmalıdır ki, bu konsertdə məktəb-sudiyanın müəllim kollektivi ilə yanaşı, həmin müəssisənin təcrübəçi tələbələri də şagirdlərə dəstək olmuşdular. 
Tədbirin sonunda Sumqayıt şəhər Qara Qarayev adına 1 №-li Uşaq Musiqi Məktəbinin direktoru, eyni zamanda vaxtilə məktəb-studiyanın məzunu olmuş istedadlı musiqiçi və pedaqoq Vüqar Hacıyev məktəb-studiyanın müəllim və şagird kollektivinə uğurlu çıxış münasibəti ilə təbrik və təşəkkürünü bildirdi.
Təməli, görkəmli musiqi xadimi, professor Tərlan Seyidov tərəfindən qoyulmuş və 40 ildən artıq fəaliyyət göstərən BMA-nın Orta ixtisas musiqi məktəb-studiyası qabaqcıl musiqi ocağı olaraq, Azərbaycan musiqi mədəniyyətinin və Azərbaycan gəncliyinin inkişafı üçün hər zaman xidmət edəcək.
Üzeyir Hacıbəyli adına BMA-nın
Orta ixtisas musiqi məktəb-studiyasının 
böyük elmi işçisi Hacıyeva Şəfəq