HÜMBƏT HƏSƏNOĞLU:

Kəbə (esse)

Məkkədən 420 kilometr məsafədə, Mədinənin yaxınlığında yerləşən “Şəcərə“ məscidində xüsusi qaydada ehrama girib, beş saat avtobusla gedəndən sonra Məkkə şəhərinə gəldik. Yükümüzü mehmanxanaya qoyub, başqa bir avtobusla Kəbənin yerləşdiyi “Məscüdül- Haram” a çatdıq. Zəvvarların axınına düşüb, əziz dostum Hacı Tahirlə Kəbənin olduğu meydana girdik.

Milyardlarla insanın gördüyü, milyonlarla insanın olduğu və qara parça ilə örtülmüş kub formasında olan binanın ətrafında biz də, hamı kimi təvaf etməyə, yəni dövrə vurmağa başladıq. Ağlımı geri çəkib hisslərimi önə qoydum. Nədir insanları bura gətirən?

Ömründə hər bir müsəlman, müəyyən vaxtda, yəni müsəlman təqvimi ilə “ Zilhiccə” ayının əvvəlində bura bir dəfə gəlməli və dəqiq müəyyənləşdirilmiş qaydaları icra etməlidir. Yazdığım Ziyarətin adı Həcc ziyarətidir. Digər on bir ayda edilən ziyarətin adı isə Ümrə ziyarətidir. Bu ziyarətin də savabı çoxdur. Peyğəmbərimiz( a. s.) də Ümrə ziyarətini həyata keçirib, bu Ziyarəti öz Ümmətinə də buyurub.

Mən Ümrə ziyarətindəyəm. Anlayıram ki, nə bu Məscid, nə bu Qara daş sitayiş mənbəyi deyil. Ən böyük günah olan “şirkin” nə olduğunu yaxşı bilirəm. Ən vacibi və önəmlisi bütün bu tikililərin arxasında Allahı görə bilməkdir!

Kəbənin ətrafında özüm üçün ilk kəşfimi edirəm: Mən Allahın içimdə olan parçasını, ruhumu götürüb bura gəlmişəm, ətrafımda olan minlərlə insan da, hərə öz ruhunu götürüb bura gətirib.

Anlayıram ki, Qara daşın ətrafında təvaf edən insan bədənləri deyil, təvaf edən insanların bura gətirdikləri ruhlarıdır.

Dərk edirəm ki, mənim sevincimə səbəb burada, Kəbənin ətrafında hərəkətdə olan ruh çayına düşmüş ruhumdur. Ruhum digər ruhlarla birlikdə ucadan “ Allahu Əkbər” deyir. Ruhumun sevinməyinə sevinirəm.

Ruhumun elə bu dünyada şad olduğu məkan mənə möhtəşəm görünür.

O biri dünyada da ruhumun necə şad ola biləcəyini də artıq bilirəm…

Allah sizlərin də ruhlarınıza Ziyarətlər qismət eləsin!

Hümbət Həsənoğlu