NƏRİMAN İSMAYILOV:

Ümummilli lider Heydər Əliyevin 100 illiyinə həsr olunmuş növbəti tədbir keçirildi

15 may 2023-cü il tarixində Üzeyir Hacıbəyli adına Bakı Musiqi Akademiyasında “Konsertmeyster ustalığı” kafedrasının dosenti, Sənətşünaslıq üzrə fəlsəfə doktoru Venera Məmmədovanın tələbələrinin sinif konserti  keçirildi.

Tədbirdə giriş sözü ilə Sənətşünaslıq üzrə elmlər doktoru, dosent Leyla Zöhrabova çıxış etmiş, Azərbaycan  xalqının Ümummilli lideri, dünya səviyyəli siyasi xadim, çoxəsrlik dövlətçilik tariximizdə yeni parlaq səhifə açan nadir, bənzərsiz şəxsiyyət Heydər Əliyevin görkəmli dövlət xadimi, müdrik siyasətçi olmaqla yanaşı, bütün yaradıcılığı boyu mədəniyyətə xüsusi sevgi və məhəbbətlə yanaşmasını xüsusilə qeyd etmişdir. Bu mədəniyyətimizin inkişafı, onun rifahı, çiçəklənməsinə yönələn bir sevgi olmasını xüsusilə vurğulamış, Azərbaycan mədəniyyətinin inkişafında Heydər Əliyevin müstəsna rolu və xidmətlərinin olmasını göstərmişdir.

O, həmçinin bu sevgi və istəyin ilk növbədə musiqiçilər, bəstəkarlar, ifaçılar və musiqişünaslar ilə görüşlərdə aydın şəkildə göründüyünü, xüsusilə Qara Qarayev, Fikrət Əmirov, Niyazi, Müslüm Maqomayev, Rəşid Behbudov ilə yaxın dostluq münasibətlərinin olmasını, onlarla müxtəlif mövzularda söhbətlər etməsini, yüksək fəxri adlara, mükafatlara layiq görülmələrində H.Əliyevin müstəsna xidmətini ön plana çəkmişdir.

 Daha sonra solistlər Əməkdar artist Rəna Əliyeva, Respublika və Beynəlxalq müsabiqələr laureatları Aqşin Xudaverdiyev, Cavanşir Rüstəmbəyli, Məhəmməd Əliyev, Nurlan Məmmədlinin iştirakı ilə tələbələr Camalə Məmmədzadə, Nəzrin Məhərrəmli, Sona İsmayılzadə, Fatimə Əskərova, Nəcibə Cəfərovanın uğurlu ifası dinləyicilərə təqdim olundu.

Konsert proqramında Vincenzo Bellininin “Norma” operasından Normanın ariyası, Edvard Elqarın “Salut d’Amour”, Vittorio Montinin “Çardaş”, Sergey Raxmaninovun “Смеркалось”, Qara Qarayevin “Я вас любил”, Fikrət Əmirovun “Sevil” operasından Dilbərin mahnısı, Vasif Adıgözəlovun “Qərənfil”, Sevil Əliyevanın “Ana”, sonda isə Müslüm Maqomayevin “Odlar yurdu” əsəri səsləndirildi.

Ümummili lider Heydər Əliyevin 100 illiyinə həsr olunmuş tədbir tamaşaçıların böyük rəğbətini qazanaraq, gurultulu alqış sədaları altında başa çatdı.

Üzeyir Hacıbəyli adına Bakı Musiqi Akademiyasının Mətbuat katibi,

musiqişünas Ofelya İsgəndərova