Kitabxanada  “Şəhidlər ölməz, Vətən bölünməz!” layihəsi davam edir

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasının Fəxri oxucusu, AYB-nin üzvü, “Ömür axarı”, “Vətənsevər” və s. kitabların müəllifi, yazıçı-publisist, şair Bədirə Rza Həsənqızı kitabxanada həyata keçirilən “Şəhidlər ölməz, Vətən bölünməz!” layihəsinə əsərlərini təqdim edir.
Yazıçı-publisist, şair Bədirə Rza Həsənqızı Neftçala rayonunda anadan olan Nicat Xankişiyevin əziz xatirəsinə “Şəhid  oğul, sən  yurdunun  NİCATI!” adlı şeirini həsr etdi. Şeirdə qorxusuz cəngavərlərin səsi olan Nicatın qəhrəmanlığı ifadə olunur.
Nicat Xankişiyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində vuruşmuşdur. Nicat Xankişiyev Füzuli, Cəbrayıl, Suqovuşan, Xocavənd, Qubadlı, Hadrut döyüşlərində yaxından iştirak etmişdir. O, 7 oktyabr 2020-ci il tarixində Hadrut uğrunda gedən döyüşlərdə həlak olmuş, anadan olduğu Həsənabad qəsəbəsində dəfn edilmişdir. Ölümündən sonra Nicat Xankişiyev "Vətən uğrunda", "İgidliyə görə", "Cəbrayılın azad olunmasına görə", "Xocavəndin azad olunmasına görə", "Şuşanın azad olunmasına görə" medalları ilə təltif olunub.
 

Şeirin videogörüntüsü kitabxananın YouTube kanalında yerləşdirilib:
https://www.youtube.com/watch?v=ZIesdxJX6m8

Şəhid  oğul, sən  yurdunun  NİCATI! 

Şəhid oğul, gözlərinə qurbanam, 
Nakam ömrün ürəklərdə göynəyir...
 Vətən üçün, torpaq üçün can fəda
Şəhadətə mələklər də baş əyir...

 Şəhid oğul, sən yurdunun  nicatı,
 Düşmən gözə neştər oldun, yaşadın! 
Əsirlikdə  olan torpaq  yolunda
Cəsurların  qisasını  daşıdın... 

 Şəhid oğul, ruhu verib Yaradan, 
Vətən dərdi ürəklərin nisgili... 
İstəmədi   xalqım olsun qan-qada
Ötdü  illər, hər kəs oldu gileyli... 

Şəhid oğul, dağlarımda ləpirin, 
Çəmənimə şeh tək düşüb qan izi... 
Ədalətin haqq səsində yüksələn
Şəhadətin  sızladıbdı  çox  bizi! 

Şəhid oğul, müqəddəsdi  sorağın, 
Sən qorxusuz cəngavərlər  səsisən! 
Yolun  işıq, bax,  azaddır  torpağın –  
Sən haqq yola, azadlığa  nəfəssən!