Söz və eşqin işığında...

Şair Ağamir Cavadın 60 illik yubileyi keçirildi

Lənkəranda şair-dramaturq, Azərbaycan Yazıçılar Birliyi Lənkəran Bölməsinin ədəbi məsləhətçisi Ağamir Cavadın 60 illik yubileyinə həsr edilmiş təntənəli tədbir keçirildi.
AYB-nin Lənkəran bölməsinin təşkilatçılığı, Lənkəran Şəhər İcra Hakimiyyətinin və Heydər Əliyev Mərkəzinin dəstəyi ilə gerçəkləşən tədbirdə şair, yazıçı və jurnalistlər, yubilyarın ailə üzvləri, dostları, iş yoldaşları, bölgənin ağsaqqal və ziyalıları, ictimaiyyət nümayəndələri, oxucular iştirak edirdi.
Mərkəzin foyesində şairin kitablarından, haqqında məqalələr dərc edilmiş qəzet və jurnallardan ibarət sərgi ilə tanışlıqdan sonra geniş iclas zalına toplaşanlar yubilyarın ömür yolundan bəhs edən videoçarxı izlədilər.
Tədbiri giriş sözü ilə açan AYB-nin Lənkəran bölməsinin sədri, yazıçı Qafar Cəfərli qonaqların və iştirakçıların alqışları ilə yubilyarı səhnəyə dəvət edərək onun haqqında qısa tanıtım verdi. 
Sonra Lənkəran Dövlət Universitetinin professoru Yədulla Ağazadə şairin həyat və yaradıcılığı haqqında geniş məruzə ilə çıxış etdi.
Bildirildi ki, Ağamir Cavad Lənkəran rayonunun Veravul kəndində anadan olub. Lənkəran Dövlət Universitetini bitirib, filologiya ixtisasına yiyələnib. 40 ildir ki, bədii yaradıcılıqla məşğuldur. AYB Lənkəran bölməsinin ədəbi məsləhətçisi, “Söz” jurnalının redaktor müavinidir. Eyni zamanda pedaqoji fəaliyyətini davam etdirir. 2017-ci ildə Prezident təqaüdünə layiq görülüb. Bir neçə kitabın müəllifidir...
AYB İdarə Heyətinin üzvü Dayandur Sevgin yubilyara Birliyin sədri Anar Rzayevin təbrikini çatdırıb, ona fəxri diplomu təqdim etdi.
Lənkəran Şəhər İcra Hakimiyyəti ictimai-siyasi və humanitar məsələlər şöbəsinin müdir müavini Cavad Miriyev yubilyarı, qonaqları və tədbir iştirakçılarını şəhər icra hakimiyyətinin başçısı adından salamladı.
Lənkəran şəhər Heydər Əliyev Mərkəzinin direktoru Reyhanə Sadıxova, Lənkəran Dövlət Universitetinin müəllimləri, tarix üzrə fəlsəfə doktoru Leyla Məcidova, pedaqogika üzrə fəlsəfə doktoru Tükəzban Cahangirova, Lənkəran şəhər 1 nömrəli tam orta məktəbinin direktoru Zaur Ağazadə, bəstəkar Zəminə Tariyelqızı Ağamir Cavadın çoxşaxəli yaradıcılığından, ictimai fəaliyyətindən söz açdılar.
Şair haqqında ürək sözlərini ifadə edən qələm dostları Balayar Sadiq, Sərvaz Hüseynoğlu, Meyxoş Abdulla, Xanlar Həmid, Hafiz Mirzə, Səyavuş Süleymanlı, Xatirə Xatun, Camal Lələzoə, Əlizaman Baxış, Qorxmaz Kadusi, Ziya Dilsuz müqəddəs sözün keşikçisi, özünəməxsus poetik üslubu ilə seçilən Ağamir Cavadı çağdaş poeziyamızın öndə gedən nümayəndələrindən biri kimi dəyərləndirib ona həsr etdikləri şeirləri oxudular, gənclik və tələbə dostları Müşfiq Məmmədov, Ağadadaş Əliyev, Əlisəfa və başqaları xatirələrini söylədilər, şairi yubiley münasibətilə təbrik edərək ona yeni yaradıcılıq uğurları arzuladılar.
Ağamir Cavadın oğlu Ağanur atasına həsr etdiyi şeirini oxudu.
Çıxışlarda A.Cavadı bölgə şairi kimi deyil, ölkə şairi kimi səciyyələndirən natiqlər ədəbiyyatımızı gözəl poetik nümunələri ilə zənginləşdirən nikbin ruhlu şairin insani xüsusiyyətlərindən, vətənpərvərliyindən danışdılar. 
Şairin şeirləri səsləndi, sözlərinə bəstələnmiş musiqilər dinlənildi. 
Yubilyara hədiyyə və fəxri fərmanlar təqdim edildi.
Sonda yubilyar Ağamir Cavad onun haqqında deyilən xoş sözlərə görə, eləcə də tədbirin təşkilatçılarına və iştirakçılara minnətdarlığını bildirdi.
 
Akif AĞAYEV