Geriyə sayım başladı...

Fikir vermisinizsə son zamanlar Azərbaycan-Ermənistan sərhədində atəşkəsdir. Heç bir insident hələlik yaşanmamaqdadır. Bu fırtına öncəsi səssizlikdir...
27 yanvar 2023-cü il tarixində Tehranda Azərbaycan səfirliyinə silahlı basqın oldu. Hücum nəticəsində səfirlik işçiləri arasında həlak olan və yaralananlar oldu. Diplomatik nümayəndəliklərə vəhşicəsinə basqın etmək hansı qanuna əsaslanır? Təbii ki, məlumdur ki, baş vermiş hadisə kiminsə sifarişi əsasında baş verib. Bunun bir neçə səbəbi ola bilər. Tarixə nəzər salsaq 1828-ci ildə İranla Türkmənçay müqaviləsi imzalandıqdan sonra Aleksandr Qriboyedov İranda rəsmi səfir təyin edilmişdi. Bəzi mənbələrə görə 1828 və 1829-cu ildə Qriboyedov Rusiyanın Tehrandakı səfirliyində qətlə yetirilir. Bu ssenari baş verən silahlı hücumla eynilik təşkil edir. İran həqiqəti təsdiqləməməklə bərabər, Azərbaycana ölkə adından üzrxahlıq etməyi də gecikdirdi. Lakin gec-tez həqiqət üzə çıxacaq...
2023-cü il daxil olandan bəri dünyada yaxşı hadisələr müşahidə edilməməkdədir. Ukrayna-Rusiya müharibəsi isə öz ampulasında davam etməkdədir. Hər il bir çox ölkələr təbii fəlakətlərlə üzləşir. Amma maraqlı hadisələr də az deyil. Fevralın 2-də 50 min ildən sonra ilk dəfə Yerə yaşıl quyruqlu ulduz yaxınlaşacaqdı. NASA-nın yaydığı məlumata görə, yaşıl kometa axırıncı dəfə 2022-ci ilin martında Yupiter ətrafında fırlanarkən müşahidə edilib. Bu hadisə həyatımızda bir dəfə görəcəyimiz hadisələrdən biri olacaqdı. Amma bəzi din xadimləri bu hadisəni imam Mehdinin gəlişi ilə əlaqələndirərək cəmiyyətə qəbul etdirməyə çalışırdılar. Deyirdilər ki, göydə quyruqlu ulduz görünəcək və bu, imam Mehdinin zühuruna yaxud dünyanın sonuna işarədir. Belə düşüncələr təbii ki, yalnız cahil, bisavad insanların yaratdığı fərziyyələrdən ibarətdir. Azərbaycanda bütün dinlərə hörmətlə yanaşılır. Bildiyimiz kimi din dövlətdən ayrıdır. Kometin görünməsi sadəcə olaraq astronomik hadisədir. Bu kimi hadisələri apokaliptik anlayışlarla əlaqələndirmək düzgün deyil. Dünyanın sonu yalnız Allahın istəyi ilə baş verə bilər. 
Hamıya məlumdur ki, bu il dovşan ilidir. Dovşanın da hərəkətləri nadir hallarda kobud və ya aqressiv olur. Bu aqressivlik də əfsuslar olsun ki, özünü yetərincə göstərdi. Yeni ilin başlamasından iki ay keçməmiş dünyanı çaxnaşmalar bürüdü. Bunlardan biri də qardaş ölkə olan Türkiyədə baş verən zəlzələdir. Bütün dünya Türkiyə üçün yardıma hazırkən bəzi müsəlman ölkələri heç barmağını belə tərpətmədi. Aşıladığınız islam dinini əməldə göstərmək lazım idi...Əyinlərinə uzun libas geyib, başlarını bağlayıb, haqq-nahaq, islam deməklə kifayətlənməyərək, milyardlıq malikanələrində sırf əyləncə məqsədilə şir, pələng bəsləyənlərdən nədənsə səs çıxmır. Halal- haramı indi ayırd etmək zamanıdır. Bəzi Avropa ölkəri, hətta düşmən dediyimiz Ermənistan və Yunanıstan belə yardım etməyə hazırkən bəzi asiyalılardan heç bir yardım belə gəlmədi. "Dost dar gündə tanınar"...
Türkiyənin 10 ayrı bölgəsində- Kahramanmaraş, Hatay, Osmaniyə,  Adıyaman, Diyarbəkir, Şanlıurfa, Qaziantep, Kilis, Adana və Malatyada dağıdıcı gücə malik zəlzələlər baş verdi. Minlərlə yaralı və kifayət qədər həlak olanlar var. Hazırda dünya ölkələri Türkiyə üçün səfərbər olmaqdadır. Prezident İlham Əliyevin tapşırığı əsasında Azərbaycan qardaş ölkəyə ilk yardıma gedənlərdən oldu. Digər ölkələr yardıma ehtiyac varmı sorşarkən Azərbaycan artıq Türkiyədə idi. Ölkə kifayət qədər dağıntılara məruz qaldı. Bu hadisənin gedişatında başqa bir utanmaz hadisə fransız nəşrindən gəldi. Fransanın “Charlie Hebdo” satirik jurnalı Türkiyədə baş verən faciəni lağ obyektinə qoyaraq, “Daha tank göndərməyə ehtiyac yoxdur” yazısı ilə nəyə mənsub olduqarını bir daha sübut etmiş oldular. Burada təəccüblənməyə ehtiyac yoxdur. Çünki ya erməni, ya da fransız eyni millətdir....Lakin Türkiyənin də buna cavabı çox gecikmədi. Türkiyə liderinin nümayəndəsi İbrahim Kalın zəlzələni əks etdirən karikaturaya sərt reaksiya verdi. Kalın şəklin müəlliflərinə öz nifrət və bədxahlıqlarında boğulmasını arzulamaqla bərabər onları “müasir barbarlar” adlandıraraq nöqtəni qoydu. Həmyerlilərimiz canla-başla tək Bakı ilə deyil, Naxçıvanla bərabər Türkiyəyə yardım kampaniyasına qoşularaq, öz dəstəklərini ifadə ediblər. Birinci xanım Mehriban Əliyevanın da göstərişinə əsasən, Heydər Əliyev fondunun dəstəyi ilə qardaş ölkəyə humanitar yardımlar göndəriləcək. 
Zəlzələdə yaralananlara şəfa, həlak olanlara isə Uca Tanrıdan rəhmət diləyirik. Tanrı türkü qorusun! 

Xeyransa İsmayıl